Tuesday, May 15, 2018

இசை என்னும் இன்ப வெள்ளம்

சில நாட்களுக்கு முன் எனக்கு வாட்ஸ்ஆப்பில் ஒரு ஒலிப்படத்தின் (video) யூ டியூப் சுட்டி வந்தது.  சமீபத்தில் வந்த பத்மாவத் படத்தின் கூமர் பாட்டு வீணையில் வாசிக்கப்பட்டுள்ளது என்று அதன் தலைப்பு சொன்னது. அந்த பாட்டு நன்றாக இருக்கும் என்பதால், வீணையில் எப்படி வாசிக்கப்பட்டுள்ளது என்ற பார்க்கும் ஆவலில் அந்த சுட்டியை தொடர்ந்தேன். 

வாசிப்பை பார்த்து அசந்துபோய்விட்டேன். இப்படி ஒரு திறமையா என்று. கலைஞரின் பெயர் ஸ்ரீவாணி. ஹைதராபதை சேர்ந்தவர். 

நான் ரசித்த அந்த ஒலிப்படம் உங்களுக்காக இதோ. நீங்கள் இதுவரை கூமர் பாடலை கேட்டதில்லை என்றால் முதலில் அதை கேட்டுவிட்டு பின்னர் அந்த பாடலின் வீணையிசை வடிவை கேளுங்கள். உங்களுக்காக இரண்டு ஒளிப்படங்களும் இங்கே.

கூமர் பாடல் (தமிழ்):



கூமர் பாடல் (ஹிந்தி):



வீணையிசை  வடிவம்:



யூ டுயூபில் அவரை பற்றி தேடியபோது, அவரது சேனல் கிடைத்தது. அதில் அவர் பல்வேறு பிரபல பாடல்களை வீணையில் அற்புதமாக வாசித்த ஒலிப்படங்கள் உள்ளன.

அவர் வாசித்ததில் எனக்கு மிகவும் பிடித்த மேலும் இரு பாடல்களின்  வீணையிசை வடிவம் உங்களுக்காக. 

மரியான் படத்தில் வரும் "இன்னும் கொஞ்சநேரம் இருந்தாதான் என்ன" என்ற பாடல் வீனையிசையாக.



அவதாரம் படத்தில் வரும் "தென்றல் வந்து தீண்டும்போது என்ன வண்ணமோ" பாடல் வீனையிசையாக.


நீங்களும் இந்த வீணையிசை வெள்ளத்தில் நீந்தி மகிழ்ந்திருப்பீர்கள் என்று நம்புகிறேன்.

Sunday, May 13, 2018

தங்க மழை பாரீர்!

From Google Images

“பொன்னர் மேனியனே புலித்தோலை அரைக்கசைத்து
மின்னார் செஞ்சடைமேல் மிளிர் கொன்றை அணிந்தவனே”

சிவ பெருமானின் ஜடாமுடியில் மிளிரும் கொன்றை பூக்கள் பூத்துக் குலுங்கும் பருவம் இது. தற்போது தில்லியில் பிரதான சாலைகள் பலவற்றில் உள்ள கொன்றை மரங்களில் தங்கமே பூக்களாய் பூத்ததோ என்று கண்டு மயங்கும்படி கொன்றைப் பூக்கள் பூத்துச் சொரிகின்றன. இலைகள் ஏதுமின்றி வெறும் பூக்கள் மட்டுமே பூத்துக் குலுங்கும் கொன்றை மரத்தை கண்டு ரசிக்க கண் கோடி வேண்டும்.
From Google Images
மேலே உள்ள திருவாசக வரிகளின் மூலம் எனக்கு கொன்றை பூவை பற்றிய அறிமுகம் கிடைத்தாலும், அது பார்பதற்கு எப்படி இருக்கும் என்று எனக்குள் ஆவலை தூண்டியது பொன்னியின் செல்வன் புதினத்தில் வரும் அதைப் பற்றிய வர்ணனையே. நான் பொன்னியின் செல்வன் படித்தது பதினெட்டு ஆண்டுகளுக்கு முன். அப்போதைய  காலகட்டத்தில் கணினியோ இணையமோ அரிது என்பதால், அதைப்பற்றி மேலும் தெரிந்துகொள்ள வாய்ப்பில்லாமல் போனது.

ஐந்து வருடங்களுக்கு முன் நான் நாக்பூரில் இருந்தபோது, ஒரு ஏப்ரல் மாத மாலை நேரத்தில் (சுமார் நான்கு மணி இருக்கும்) பேருந்தில் பயணித்துக்கொண்டிருந்தபோது சாலையோரம் இருந்த ஒரு மரத்தில் இலைகளே இல்லாமல், வெறும் பொன்னிற மஞ்சள் பூக்கள் மட்டும் பூத்துக்குலுங்கியதை கண்டு அதிசயிதுப்போனேன். மாலை வெயில் அம்மலர்களின் மீது பட்டு அதில் அந்த பூக்கள் ஜொலித்த காட்சி இன்னும் என் மனக்கண்ணிலிருந்து மறையவில்லை. அப்போதுதான் தோன்றியது, இவையே நான் காண விரும்பிய கொன்றை மலர்களாய் இருக்கலாம் என்று.

அதன் பிறகு, இரண்டு ஆண்டுகள் கழித்து, எங்கள் அலுவலகத்திலேயே இருந்த கொன்றை மரம் முதல் முறையாக பூத்தது. அப்போதுதான் தெரிந்தது நான் அன்று பார்த்தது கொன்றை மலர்களே என்று.
அலுவலக வளாகத்தில் பூத்த கொன்றை மலர்கள் 
தற்போது தில்லியில் பல முக்கிய சாலைகளில் கொன்றை பூத்துக் குலுங்குவதால் அவ்வழியாக பயணிக்கும்போதெல்லாம் அவற்றை கண்டு வியந்து ரசிப்பதே என் பொழுதுபோக்கு ஆகிவிட்டது.

இதைப்பற்றி இணையத்தில் தேடியபோது, ஆங்கிலத்தில் இதன் பெயர் கோல்டன் ஷவர் ட்ரீ என்பது தெரிந்தது. இதன் தாவரவியல் பெயர் காசியா Fபிஸ்டுலா என்பதாகும். இது இந்தியாவை பூர்வீகமாகக் கொண்ட மரமாம். தெற்கு மற்றும் தென் கிழக்கு ஆசிய பகுதியில் இவை காணக் கிடைக்குமாம்.

தில்லியில் பூத்த கொன்றை 
கேரளாவின் மாநிலப் பூ மற்றும் தாய்லாந்து நாட்டின் தேசியப் பூ ஆகிய சிறப்புகள் இந்த கொன்றை பூவுக்கு உண்டு. பல கோயில்களின் தல விருட்சம் என்னும் பெருமையும் கொன்றைக்கு  இதற்குள்ளது. விஷு பண்டிகையின்போது பூஜையில் கொன்றை பூ பயன்படுத்தப் படுவதாக குமரி மாவட்டத்தைச் சேர்ந்த ஒரு சக அதிகாரி தெரிவித்தார். இதன் பட்டை, வேர், பூ மற்று காய் மருந்தாகவும் பயன்படுத்தப்படுகின்றன.

“புத்தம் புது பூமி வேண்டும், நித்தம் ஒரு வானம் வேண்டும்
தங்க மழை பெய்ய வேண்டும் தமிழில் குயில் பாட வேண்டும்” 
என்று ஒரு பாட்டு திருடா திருடா படத்தில் வரும். கொன்றை பூத்துக் குலுங்குவதை பார்க்கும்போது, தங்க மழை பொழிகிறது பாருங்கள் என்று கத்தவேண்டும் போல் தோன்றுகிறது.

From google Images
சரம் சரமாய் பூத்துத் தொங்கும் இந்த மலர்களை பார்த்துக்கொண்டு இருப்பதே மனதிற்கு அமைதி தருவதாக இருக்கிறது.  சாலைகளின் இருபுறமும் இந்த மரத்தை நட்டு வைத்தால், வெயில் காலத்தில் இந்த பூக்களை பார்த்து வெம்மையின் கொடுமையை மறந்து இருக்கலாம்.
From Google Images
அடுத்தமுறை நீங்கள் கொன்றைப் பூக்கள் பூத்துச் சொரிவதை பார்த்தால் ஒரு நிமிடமாவது நின்று அதன் அழகை ரசித்துவிட்டுச் செல்லுங்கள்.




Thursday, May 03, 2018

மஞ்சக்காட்டு மைனா




சில நாட்களுக்கு முன் அலுவலகத்திலிருந்து மெட்ரோவில் வீடு திரும்பும்போது கேட்ட உரையாடல் இது: (ஹிந்தியில் நடந்த உரையாடல் உங்களுக்காக தமிழில்)

நான் அண்ணிக்கு குடிச்சிட்டு வீட்டுக்கு போனேன். போய் படுத்துடலாம்னு நெனச்சேன். ஆனா நான் உள்ள நுழைஞ்சதுமே எல்லாரும் என்னை ஒருமாதிரி பார்த்தாங்க. நான் குடிச்சிட்டு வந்தத வீட்ல கண்டுபிடிச்சிட்டாங்கனு தெரிஞ்சிபோச்சு.

அப்பறம் என்ன ஆச்சி?

எல்லாருக்கும் தெரிஞ்சிடுச்சேனு எனக்கு ஒரு மாதிரி ஆயிடுச்சி. அது வெயில் காலம் வேற. வீட்ல ஏசி ஓடிட்டு இருந்தது. எல்லா கதவும் மூடி இருந்ததால், ட்ரிங்க்ஸ் வாசனை வீடெல்லாம் குப்புனு பரவிடுச்சி. நான் எக்கசெக்கமா குடிச்சிருக்கேன்னு அப்பதான் புரிஞ்சுது.
                                                                               

யாரும் ஒண்ணும் சொல்லலையா?

மொறச்சி பாத்தாங்க. அண்ணண் மட்டும் என் கிட்ட வந்து இவ்ளோ குடிக்காத. லிமிட்டுக்குள்ள வெச்சிக்கோன்னு சொன்னான். இப்பல்லாம் அளவோடதான் குடிக்கிறேன். 2க்கு மேல போறதில்ல. எப்பவாவது 3. (2, 3 என்பதின் பதவுரையை  அனுபவஸ்தர்கள் சொன்னால் என் பொது அறிவை மேம்படுதிக்கொள்வேன்)

நிஷா குடிப்பாளா?

அவ ஒரேயொரு வாட்டி டேஸ்ட் பாண்ணினா அவ்வளவுதான். அவளுக்கெல்லாம் புட்டில பால் ஊத்திதான் தரணும்.


இவையெல்லாம் பேசியது அருகில் நின்றுகொண்டிருந்த இரண்டு இளம்பெண்கள். இதைதவிர அவள் அக்கா கல்லூரியில் படிக்கும்போது குடித்தது, ஒருமுறை அவள் (குடித்துவிட்டு?) கார் ஓட்டிச் சென்றபோது ஏதோ பிரச்சினை ஆகிவிட, அவள் அக்காவும், அக்கா  பையனும் உடன் இருந்ததால் என்ன செய்வது என்று தெரியாமல் முழித்துக்கொண்டு கொண்டிருந்தது, என தன் மற்றும் தன் குடும்பத்தினரின் இன்னும் சில பல குடி பிரதாபங்களை மஞ்சள் நிற ஸ்லீவ்லெஸ் டாப்சும், கருப்பு பேன்ட்டும் அணிந்த, பருத்த உதடுகளில் கருஞ்சிவப்பு சாயம் பூசியிருந்த, கூந்தலை விரித்துபோட்டிருந்த அந்த பெண் சொல்லிக்கொண்டிருக்க, இன்னொருத்தி அமைதியாக கேட்டுக்கொண்டிருந்தாள். இடையிடையே மானே தேனே பொன்மானே போல தோழி சில கேள்விகளையும் கேட்டாள். ரயிலில் கூட்ட இரைச்சலினாலும், தொடர்ந்து வரும் அறிவிப்புகளாலும் அவர்கள் பேசியதில் பல பகுதிகள் காதில் சரியாக விழவில்லை.
                                                                 Image result for men standing in train
இவர்கள் அருகிலேயே நம்ம ஊர்க்காரர்கள் இருவர் நின்றுக்கொண்டிருந்தனர். தில்லியில் மத்திய அரசு பணியில் இருக்கிறார்கள் என்பது அவர்கள் அணிந்திருந்த அடையாள அட்டை மூலம் தெரிந்தது. ஏதோ அலுவலக விஷயங்களையும் மற்ற விஷயங்களையும் பேசியவாறு வந்தார்கள், அவர்கள் நண்பர்களுடன் சேர்ந்து தங்கியிருக்கிறார்கள் என்று அவர்கள் பேசியதிலிருந்து புரிந்தது.

அந்த பெண்கள் இறங்கவேண்டிய  நிறுத்தம் நெருங்கவும், அவர்கள் நம்மூர்காரர்களை தாண்டி செல்ல, நம்மாட்களில் இளையவரானவர் மஞ்சக்காட்டு மைனா போகுதே. நாமளும் இங்கயே இறங்கிடலாமா என மற்றவரை கேட்க, அவர் சிரித்துவிட்டு எதுவும் சொல்லாமல் இருந்தார். அவர்கள் பேசிக்கொண்டிருந்தாலும் இளையவரின் கண் அந்த மஞ்சக்காட்டு மைனா மேல்தான் இருந்தது என்பதும் அவளைப் பார்த்து ஜொள் விட்டுக்கொண்டு இருந்தார் என்பதும் அப்போதுதான் தெரிந்தது.


அந்த பெண்களோ இரண்டு மூன்று நிறுத்தங்கள் கடந்துதான் இறங்கினார்கள். அவர்கள் இறங்கியதை அப்போதுதான் கவனித்த அந்த இளைய தமிழர், ஐயோ, இங்கதான் எறங்க போறாங்கனு தெரிஞ்சிருந்தா நாமளும் அவங்க பக்கத்துல போய் நின்னிருக்கலாமே என்று ஏக்கமாய் சொல்லிக்கொண்டிருந்தார் தன் நண்பரிடம். அவர்களும் ஓரிரண்டு நிறுத்தங்கள் தாண்டி இறங்கிவிட்டனர்.
                                                                                           Image result for ugly womens face
இத்தனைக்கும் அந்த மஞ்சக்காட்டு மைனா ஒன்றும் அழகி அல்ல. சுமார் என்று கூட சொல்ல முடியாது. விரித்துவிட்ட கூந்தலும் அடர் நிற லிப்ஸ்டிக்கும் அவளை விகாரமாக காட்டிக்கொண்டிருந்தன. ஊரை விட்டு வெகுதொலைவில் வந்திருப்பதால் மிகவும் காய்ந்து போய் கிடக்கிறாரோ என்னவோ நம்ம ஊர்காரர்.

குடித்துவிட்டு வரும் தங்கையை அளவோடு குடிக்கச் சொல்லும் அண்ணனையும், குடிக்காத பெண்ணை பாலை புட்டியில் ஊற்றி குடிப்பவள் என்று கிண்டல் செய்யும் பெண்ணையும் பார்க்கும்போது நாடு வல்லரசாகும் நாள் வெகு தொலைவில் இல்லை என்று தெரிகிறது.


Image courtesy: Google

Monday, March 19, 2018

அவள் தந்த முத்தம்

Courtesy: Google Images
இன்றைய பதிவு நான் பார்த்த ஒரு குறும்படம் பற்றியது. படத்தின் பெயர் கிஸ்.  படத்தின் பெயர் தான் ஆங்கிலத்தில். படம் என்னவோ தமிழ் படம் தான்.

சமூகத்தின் கீழ்தட்டில் இருக்கும் சாதாரண இளவட்டங்களின் வாழ்க்கையில் நடக்கும் ஒரு சம்பவத்தை இயல்பாக சித்தரிக்கும் ஒரு குறும்படம். கதாநாயகன் தண்ணீர் குப்பி விநியோகம் செய்யும் ஒரு விடலை. அவன் பெயர் படம் முழுக்க எங்குமே சொல்லப்படவில்லை. கதாநாயகி பிரியா வீட்டுவேலை செய்யும் ஒரு விடலி. ஒரே ஒரு முறை கதாநாயகன் அவளை பெயர் சொல்லி அழைப்பதால் அது நமக்கு தெரிகிறது. எப்போதும்போல் கதாநாயகன் கதாநாயகியை காதலிக்கிறான். அதை அவன் அவளுக்கு தெரிவித்ததுமே, அதை எதிர்பார்த்திருந்தவளாய், அவளும் எதிர்ப்பு எதுவும் காட்டாமல் எற்றுக்கொள்கிறாள்.

ஒருநாள் இருவரும் கடற்கரைக்கும் போகிறார்கள். கடற்கரையில் இருவரும் கதாநாயகனின் கைபேசியில் வீடியோ எடுத்துக்கொண்டிருக்கையில், அவன் எதிர்பாராத ஒரு தருணத்தில் அவள் அவன் கன்னத்தில் முத்தம் தந்துவிட்டு ஓடுகிறாள். அவளை துரத்திச் செல்கையில் அவன் கைபேசி அலை நீரில் விழுந்திவிடுகிறது.

பழுதான கைபேசியை சரி செய்த கடைக்காரன், அதை திருப்பிக் கொடுக்க இரண்டாயிரத்து ஐநூறு ருபாய் கேட்கிறான். காரணம் கைபேசியில் இருந்த அந்த முத்தக்காட்சி வீடியோ. கேட்ட பணத்தை தராவிட்டால் வீடியோவை இணையத்தில் ஏற்றிவிடுவதாக மிரட்டுகிறான். கதாநாயகன் நண்பர்களிடம் அழுதுகொண்டே விஷயத்தை சொல்ல அவர்கள் சென்று பிரச்னையை முடித்துவைக்க பார்க்கிறார்கள். அனால் அவர்கள் சென்றவுடன் கடைக்காரன் கேட்ட தொகை 2500-ல் இருந்து 5000 ஆகிவிடுகிறது. காதலிக்கு தெரிந்தால் அவள் தற்கொலை செய்துகொள்வாள் என்று பயப்படுகிறான் அவன். இரண்டாயிரம் ருபாய் கொடுத்து கைபேசியை திரும்பப்பெற முயற்சிக்கிறான் கதாநாயகன். ஆனால் கடைக்காரனோ பிடிவாதமாக இருக்க, என்ன செய்வது என்று தெரியாமல் காதலியிடம் நடந்த விஷயத்தை சொல்லி அழுகிறான்.

அவள் அவனை அழைத்துக்கொண்டு கடைக்கு வருகிறாள். அவளை பார்த்ததும் கைபேசியை சரி செய்வதற்கான தொகையை மட்டும் பெற்றுக்கொண்டு கைபேசியை திருப்பி தருகிறான். அனால் அவளோ கடைக்காரன் வைத்திருக்கும் அந்த வீடியோவை உடனே அழிக்கச் சொல்கிறாள். அவன் பிறகு செய்வதாய் சொல்ல இருவருக்கும் வாக்குவாதம் முற்றுகிறது. அவளிடமும் அவன் அந்த வீடியோவை  இணையத்தில் ஏற்றப்போவதாக மிரட்ட, கதாநாயகி பிரச்சினையை எப்படி முடிக்கிறாள் என்பதுடன் முடிகிறது. படம். என்ன செய்கிறாள் என்பதை படத்தை பார்த்து தெரிந்து கொள்ளுங்கள்.

படத்தில் எல்லாருமே மிக இயல்பாக நடித்திருக்கிறார்கள். குறிப்பாக நாயகியும் நாயகனும். நிலைமை கைமீறி போனதால் நாயகன் அழுதாலும், கடைக்காரன் நாயகியை திட்டும்போது பொங்குவது, சூழ்நிலைகள் சாதுவையும் முரடனாக்கிவிடும் என்று காட்டுகிறது. கதாநாயகி அவள் நிலையையொத்த பெண்களுக்கே உரிய தைரியத்துடன் வலம் வருகிறாள். நாயகனுடன் ஷேர் ஆட்டோவில் பயணிக்கும்போது, அவன் பக்கம் திரும்பும்போது சிடுசிடுப்பதும் மறுபுறம் திரும்பி சந்தோஷமும் காதலும் கலந்த புன்னகை பூப்பதும் அழகு.

கடைக்காரன் வீடியோவை அழிக்க மறுக்கும்போது நாயகி நாயகனை பார்த்து கம்ப்யூட்டரில் இருக்கும் வீடியோவை தேடி அழிக்க தெரியுமா என்று கேட்கிறாள். அவனும் நன்றாக தெரியும் என்கிறான். அவ்வளவு தெரிந்தவன், கைபேசியை சரிசெய்ய கொடுக்கும்போது அதில் இருக்கும் மெமரி கார்டை எடுத்துவிட்டு தரவேண்டும் என்று தெரியாதா. இத்தனைக்கும் அவன் கைபேசியை கடைக்காரனிடம் தரும்போது பேட்டரியையும் சிம் கார்டையும் கழற்றிவிட்டுத்தான் தருகிறான்.

நாயகனின் நண்பர்கள் கதாபாத்திரங்களும் மிகையில்லாமல் அமைக்கப்பட்டுள்ளன. ஒருவன் ஆறுதல் சொல்வது, ஒருவன் ஜாக்கிரதை உணர்வுடன் யோசிப்பது, மற்றொருவன் சண்டைக்கு தயாராவது என ஒவ்வொருவரும் ஒவ்வொரு விதத்தில் நாயகனுக்கு உதுவுகிறார்கள்.

நாயகி கடைக்காரனிடம் வாக்குவாதம் செய்யும்போதே எனக்குள் இருந்த இயக்குன(ன்)ர் விழித்துக்கொண்டான். நான் ஊகித்தது போலவே படம் முடிந்ததில் எனக்கு பெருமகிழ்ச்சி.


நீங்களும் குறும்படத்தை பார்த்துவிட்டு உங்கள் கருத்துக்களை பகிர்ந்துகொள்ளுங்கள்.




Saturday, March 17, 2018

பரீட்சைக்கு நேரமாச்சு


தமிழ் நாட்டில் பத்தாம் வகுப்பு போதுக்தேர்வுகள் நேற்று (16.03.2018) துவங்கின. முதல் தேர்வாக தமிழ் முதல் தாள் நேற்று நடந்தது. இதைப்பற்றி தொலைக்காட்சி செய்திகளில் சொல்லப்பட்ட ஒரு விஷயத்தை கேட்டு சிரிப்பதா, கோபப்படுவதா, வருத்தப்படுவதா என்று புரியவில்லை. விஷயம் இதுதான். நேற்றைய தேர்வில் கேள்விகள் சற்று கடினமாக இருந்ததாக மாணவர்கள் சொன்னார்களாம். அதை சில மாணவர்களிடம் பேட்டி வேறு எடுத்து ஒளிபரப்பினார்கள்.


புத்தகத்தில் பாடத்தின் இறுதியில் கொடுக்கப்பட்டிருக்கும் ரெடிமேட் கேள்விகளை கேட்காமல் வேறு கேள்விகள் கேட்டு விட்டார்களாம். அதுவும் எப்படிப்பட்ட கேள்விகள் தெரியுமா? ஒரு மதிப்பெண் கேள்விகள். பெரும்பாலும் ஒற்றைச்சொல் விடை கொண்டவை.



ஒரு மதிப்பெண் கேள்விகள் அந்த பாடத்தின் அடிநாதமாக இருக்கும் விஷயங்கள் பற்றி தான் இருக்கும். ஒரு பத்தாம் வகுப்பு மாணவனுக்கு அப்படிப்பட்ட ஒரு விடை எழுதுவது கடினம் என்றால் அவர்களின் தரம் பற்றி என்ன சொல்வது. இப்படிப்பட்ட மாணவர்கள் எப்படி எதிர்காலத்தில் தங்கள் வாழ்க்கையில் சந்திக்கப்போகும் விஷயங்களை புரிந்துகொண்டு  சுயமாக முடிவெடுப்பார்கள் என்று தெரியவில்லை.

                                                                              

எத்தனையோ முறை நமது கல்வி முறை மாற்றப்பட வேண்டியதைப்பற்றி பேசப்பட்டிருந்தாலும், அதை செய்வதற்கு யாரும் தயாராக இருப்பதாக  தெரியவில்லை. மீண்டும் மீண்டும் பாடத்திட்டம் மாற்றப்படுகிறதே தவிர, கற்பிக்கும் முறையிலோ, தேர்வு முறையிலோ எந்த மாற்றமும் இதுவரை கொண்டுவரப்படவில்லை. நம் சமூகத்திற்கு என்று மதிப்பெண் மீதான மோகம் தீர்ந்து அறிவு மீதான தாகம் வருகிறதோ, அன்றுதான் ஒரு விடிவு வரும் என்று தோன்றுகிறது.

Saturday, March 10, 2018

பத்மாவத் - என் பார்வையில்


சில நாட்களுக்கு முன் பத்மவத் படம் 3டி-ல் பார்த்தேன். இந்தப்படம் பதினாறாம் நூற்றாண்டில் மாலிக் முஹம்மது ஜாயசி என்பவர் எழுதிய பத்மாவதி என்ற புத்தகத்தின் அடிப்படையில் எடுக்கப்பட்டுள்ளது. கதை எல்லாருக்கும் தெரிந்ததுதான் என்பதால் படத்தை பற்றிய என எண்ணங்களை மட்டும் இங்கு பதிவிடுகிறேன்.

படத்தின் ஆரம்பமே அலாவுதீன் கில்ஜியின் அதீத முரட்டு குணத்தை காட்டும் விதமாக அமைக்கப்பட்டுள்ளது. படைத்தலைவனான அலாவுதீன் சுல்தான் ஜலாலுதீன் கில்ஜியின் மகள் நெருப்புக்கோழியின் இறகை கேட்டாள் என்பதற்காக ஒரு நெருப்புக்கோழியையே பிடித்துக்கொண்டு வந்து தருகிறான். அதற்கு பரிசாக அவளையே மணக்கிறான்.


அவன் ஒரு போரில் வென்று கைப்பற்றும் ஒரு மிகச்சிறந்த ரத்தினத்தை ஜலாலுதீன் பறித்துக்கொன்டதும், மாமனார் என்றும் பாராமல் அவனை கொன்று தான் சுல்தான் ஆவது அவன் எதையும் செய்தத் தயங்காதவன் என்பதை காட்டுகிறது. மிகச்சிறந்தவை எல்லாம் தனதாக இருக்கவேண்டும் என்பதே அவன் பேரவா.

படம் முழுக்க வியாபித்து இருப்பது அலாவுதீன் கில்ஜிதான். பத்மாவதியும் அவள் கணவன் ரதன் சிங்கும் துணை கதாபத்திரங்களாகவே தோன்றுகிறது. பத்மாவத் என்பதற்கு பதிலாக அலாவுதீனின் தோல்வி என்று படத்திற்கு பெயர் வைத்திருந்தால் பொருத்தமாகவும் சர்ச்சைகளெல்லாம் இல்லாமலும் இருந்திருக்கும் என்று நினைக்கிறேன்.

பாஹுபலி-2-வில் இளவரசி தேவசேன அறிமுகம் ஆகும் காட்சியை ஒப்பிட்டால் இளவரசி பத்மாவதியின் அறிமுக காட்சி சாதாரணமாகவே தோன்றுகிறது. அடிபட்ட ரதன் சிங் காயம் குணமாகி நாடு திரும்புவதாக சொல்லும்போது பத்மாவதி அவன் மார்பில் கத்தியால் கீரிவிட்டு உனக்கு இன்னும் காயம் ஆறவில்லை என்று சொல்லி அவள் காதலை சொல்லாமல் சொல்வது அழகு.


மன்னன் ராஜகுருவை சிறையில் அடைக்கச் சொல்லும்போது, சிறந்த அறிவாளியாக சொல்லப்படும் பத்மாவதி, ராஜகுருவை நாடு கடத்தச் சொல்வது முரண்பாடாக தெரிகிறது. நாடு கடத்தப்பட்ட ஒருவன் நாட்டிற்கு எதிராக வேலை செய்வது மிகச்சுலபம் என்பது அவளுக்கு தெரியாதா என்ன.

ரதன் சிங் நேர்மையானவனாக நியாய தர்மத்திற்கு கட்டுப்பட்டவனாக இருப்பது சரி. அதற்காக எந்த விதிகளையும் பின்பற்றாத எதிரியான முரடன் அலாவுதீனிடம் கூட அப்படி இருப்பது, ரதன் சிங் இப்படி முட்டாள்தனமாக நடந்து கொள்கிறானே என்று நாம் வருத்தப்படும்படி உள்ளது.


அலாவுதீன் கோட்டையை முற்றுகையிட்டு அதன்மீது நெருப்புப் பந்தங்களை இயந்திரம் மூலம் வீசும்போது, மேவாத் நாட்டு படைத்தலைவர்கள், இது என்ன புது விதமான ஆயுதம் கொண்டு தாக்குகிறார்கள் என்று பேசிக்கொள்கிறார்கள். அரசனின் உளவுப்படை எதிரியிடம் இருக்கும் ஆயுதங்கள் பற்றி தகவல் தராமல் இருந்திருப்பார்களா என்ன.

இறுதியில் ரதன் சிங்கும் அலாவுதீனும் நேருக்கு நேர் சண்டையிடும்பொது, அலாவுதீனின் அடிமை மாலிக் கபூர் தன் எஜமானனை காக்க ரதன் சிங் மேல் அம்பு எய்கிறான். ஆனால், எதிரே நின்று பார்த்துக்கொண்டு இருக்கும் ரதன் சிங்கின் படைத் தலைவர்களோ ஒன்றும் செய்யாமல், குறைந்த பட்சம் ரதன் சிங்கிற்கு எச்சரிக்கை கூட செய்யாமல் வேடிக்கை பார்ப்பது ஏன் என்று புரியவில்லை. மாலிக் கபூர்க்கு இருக்கும் எஜமான விஸ்வாசம் ரதன் சிங்கின் ஆட்களுக்கு இல்லாதது ஆச்சர்யமாக இருக்கிறது.


அலாவுதீன் கில்ஜி பாத்திரத்தில்  ரண்வீர் சிங் கலக்கி இருக்கிறார் என்றே சொல்லவேண்டும். அவர் உயரமும் உடற்கட்டும் அந்த கதாபாத்திரத்திற்கு கண கச்சிசிதமாக  பொருந்துகிறது. தீபிகா படுகோனேவும் ஷாஹித் கபூரும் தங்கள் பாத்திரங்களை நிறைவாகவே செய்திருக்கிறார்கள்.

படம் முழுக்கவே ரதன் சிங்கின் முகம் அரச கம்பீரம் இன்றி ஒருவித சோர்வுடனும் கவலையுடனும் இருப்பதாகவே எனக்கு தோன்றுகிறது. மாலிக் கபுராக வரும் ஜிம் சரப் அந்த கதாபாத்திரத்தின் கொடிய குணம், காமம், பொறாமை, குரூரம், ஏளனம் என எல்லா உணர்வுகளையும் தன் பார்வையாலேயே காண்பித்து அசத்துகிறார். 


கதை பதினான்காம் நூற்றாண்டில் நடந்தது என்பதால் உட்புற காட்சிகள் அனைத்துமே விளக்குகளும் தீப்பந்தங்களும் தரும் ஒளியில் அமைத்திருப்பது அருமை.

3-டி-யில் சிலகாட்சிகளில் மனிதர்களின் உருவம், குறிப்பாக தீபிகாவின் உருவம், இயல்பாக இல்லாமல் அனிமேஷன் செய்தது போல இருக்கிறது. 

பத்மாவதியையோ ராஜபுத்திரர்களையோ சிறுமை படுத்துவதுபோல எந்த காட்சியும் இருப்பதாக எனக்கு தோன்றவில்லை. பத்மாவதி மற்ற பெண்களுடன் சேர்ந்து கூமர் நடனம்  ஆடுவதுதான் பிரச்சினை என்றால், அந்த பாடல் வரும்போது, உண்மையில் அரசிகள் இப்படி நடனம் ஆடமாட்டார்கள், படத்திற்காகவே இந்த காட்சி அமைக்கப்பட்டுள்ளது என்று ஒரு அறிவிப்பு போட்டு பிரச்னையை முடித்திருக்கலாம். இதற்கான போராட்டங்கள் சற்று அதிகப்படியாகவே தோன்றுகிறது.


மொத்தத்தில் பிரம்மாண்டமாக தயாரிக்கப்பட்ட ஒரு படம். தயாரிக்கப்பட்ட விதத்திற்காக ஒருமுறை பார்க்கலாம்.

படங்கள் தந்து உதவியது: கூகுள் 

Friday, February 16, 2018

பல்பு வாங்கிய தருணங்கள்


கிரிக்கெட்டில், வீசப்பட்ட பந்து, பேட்ஸ்மேனின் எதிர்பார்ப்பிற்கு மாறாக, வேறு திசையில் திரும்பி எகிறுவதை கூக்லி என்பர்.

இதுபோன்ற அனுபவம் நமக்கும் சில சமயங்களில் ஏற்பட்டிருக்கும். நம் எதிர்பார்ப்பிற்கு முற்றிலும் மாறாக ஒரு விஷயத்தின் முடிவு இருக்கும். அதுபோல் எனக்கு ஏற்பட்ட இரண்டு அனுபவங்கள் இவை.

அந்நாட்களில் தூர்தர்ஷனில் உலா வரும் ஒளிக்கதிர் என்ற ஒரு நிகழ்ச்சி வந்து கொண்டிருந்தது. அதில் தமிழகத்தில் நடந்த சில நிகழ்சிகளின் முக்கியமான பகுதிகளை தொகுத்து ஒளிபரப்புவார்கள். அப்படி ஒருநாள், தொழு நோய் பற்றி நடந்த ஒரு மருத்துவ மாநாட்டில் மருத்துவர் ஒருவர் பேசுவதை காட்டினார்கள். அதில் அவர் தொழு நோய் பற்றி ஆராய்ச்சி செய்ய வெளிநாட்டு மருத்துவர்களும் ஆராய்சியாளர்களும் இந்தியாவிற்கு வருகிறார்கள் என்று குறிப்பிட்டார். அதை கேட்டதும், ஆஹா! வெளிநாட்டினரெல்லம் இங்கு வரும் அளவுக்கு தொழு நோய் ஆராய்ச்சியில் நம் நாடு அவ்வளவு முன்னேறிவிட்டதா என்று நினைத்து பெருமிதம் கொண்டேன். ஆனால், அந்த பெருமை ஒரு நொடி கூட நீடிக்கவில்லை. அடுத்த வரியில் அவர் சொன்னது, ஏனென்றால் அந்த நாட்டிலெல்லாம் தொழு நோயே கிடையாது. அதை கேட்டதும் நொந்து போய்விட்டேன். செம கூக்லி இல்ல.

அடுத்ததை கேளுங்கள். சென்னை வானொலியில் உங்கள் விருப்பம் என்று ஒரு நிகழ்ச்சி வரும். இப்போதும் இருக்கிறது என்று நினைக்கிறேன். அதில் நேயர்கள் விரும்பிக் கேட்ட பாடல்களை ஒலிபரப்புவார்கள். அதில் நேயர்களின் பெயர் மற்றும் அவர்களின் ஊர் பெயர்களை சொல்லி, இவர்கள் விரும்பி கேட்ட பாடல் என்று அறிவித்து பாட்டு போடுவார்கள்.

இதை பார்த்து ஒரு அற்புதமான சாக்லேட் விளம்பரம் உருவாக்கினார்கள் இருபது வருடங்களுக்கு முன். முதல் முறையாக அந்த விளம்பரத்தை கேட்பவர்கள் யாருமே எமாந்து போவர்கள். அந்த விளம்பரத்தில் உங்கள் விருப்பம் நிகழ்ச்சியில் வருவது போலவே பெயர்களும் ஊர் பெர்யர்களும் வாசித்த பின் இவர்களெல்லாம் தயவுசெய்து என் பெண்ணை follow செய்யாதீங்க என்று ஒரு அப்பா சொல்வது போல் முடியும். கொஞ்சம் கற்பனை செய்து பாருங்கள். நீங்களும் அந்த விளம்பரத்தை உருவாக்கியவரின் ஆக்கத் திறமையை பாராட்டுவீர்கள். சரி, அந்த சாக்லேட்டின் பெயர் என்ன தெரியுமா? கூக்லி.


இவை தான் அந்த கூக்லி சாக்லேட் என்று நினைக்கிறேன். இதுவரை அந்த சாக்லேட்டை நான் பார்த்ததில்லை. நீங்கள் பார்த்திருக்கிறீர்களா?


Tuesday, February 13, 2018

ஜீ... பூம்... பா...


சில நாட்களுக்கு முன் கிடைத்த ஒரு வித்தியாசமான சிலிர்ப்பான அனுபவம் இது. அலுவலகத்தில் உடன் பணிபுரியும் அதிகாரி ஒருவர் தன் நண்பர் ஒருவர் அவரை சந்திக்க வரப்போவதாகவும் அவரை எனக்கும் என் சக அதிகாரி ஒருவருக்கும் அறிமுகம் செய்துவைப்பதாகவும் சொன்னார். அப்படியானால் வரப்போகும் நபர் ஏதோவொரு வகையில் சிறப்பானவர் என்பது புரிந்தது. அவரே தொடர்ந்து சொன்னார் வரப்போகும் நபர் ஒரு மாயாஜாலக்காரர் என்று.

நண்பரும் அலுவலக நேரம் முடிந்து ஒரு சில நிமிடங்களில் வந்தார். அவருடன் அவர் உதவியாளரும் வந்திருந்தார். வந்த அந்த நண்பரின் பெயர் ஷங்கர். அவர் வயது எப்படியும் 70க்கு மேல் இருக்கும் என்று நினைக்கிறேன்.

பரஸ்பர அறிமுகம் செய்துவைத்த சக அதிகாரி, எங்களுக்காக சில மாயாஜாலங்கள் செய்து காட்டுமாறு வேண்ட, அவர் ஒரு காகிதத் துண்டு தருமாறு கேட்டார்.

அவர் செய்த முதல் தந்திரம் அந்த சிறு துண்டு காகிதத்தை நன்றாக கசக்கி மீண்டும் அதை பிரித்தார். எங்களுக்கு ஆச்சரியம் கலந்த அதிர்ச்சி. பிரித்ததும் அது ஒரு இரனடாயிரம் ருபாய் தாளாக அவர் கைகளில் விரிந்தது. இது மீண்டும் அந்த காகித துண்டாக மாறிவிடும் என்று சொல்லி அதை மடித்து கோட் ஜோபியில் போட்டுக் கொண்டார்.


அடுத்ததாக இரண்டு நாணயங்களை கையில் எடுத்துக்கொண்டு அவற்றை சட்டை ஜோபியில் போட்டு கையிலிருந்து எடுத்தல், வேறு கைக்கு மாற்றி ஜோபியிலிருந்து எடுத்தல் என்று வேறு வேறு விதமாய் மாற்றி மாற்றி மறைத்து எடுத்து காட்டினார்.

அடுத்ததாக என் கையை நீட்டச்சொல்லி என் கையை அவர் கையால் தடவினார். உடனே என் கையில் ஒரு பாதாம் பருப்பு இருந்தது. அப்போது எனக்கு ஏற்பட்ட அந்த ஆச்சர்ய உணர்வை வார்த்தைகளால் சொல்வது கடினம்.

கடைசியாக அவர் முன்பு ஜோபியில் போட்ட அந்த இரண்டாயிரம் ருபாய் தாள் காகித துண்டாக மாறிவிட்டதா பார்க்கலாம் என்று சொல்லி அதை வெளியே எடுத்தார். பார்த்தல் அது அப்படியே மடித்த நிலையிலேயே இருந்தது. அதை அவர் பிரிக்க அது அப்படியே பல நூறு ருபாய் தாள்களாக மாறியது. கண் முன் நடந்த அந்த அதிசயத்தை கண்டு ஸ்தம்பித்துப் போனோம்.

அவர் வேறோர் இடம் செல்லவேண்டி இருந்ததால், அத்துடன் முடித்துக்கொண்டு புறப்பட்டார்.

சிறுவயதிலிருந்தே அவருக்கு மாயாஜாலத்தில் விருப்பம் அதிகமாம். பின்னர் அவர் பி.சி.சர்க்கார் சீனியர் உடன் 5 ஆண்டுகள் பணிபுரிந்து மாயாஜாலம் கற்றாராம். உலகில் பல நாடுகளில் அவர் மாயஜால நிகழ்சிகள் நடத்தியுள்ளாராம். அவருடைய நிகழ்சிகளின் வீடியோக்களை யூ-ட்யூபில் காண Jadugar Samrat Shankar என்று தேடவும்.

அது எல்லாமே கண் கட்டு வித்தை என்று தெரிந்தாலும் அதை ஆகில் இருந்து பார்க்கும்போது ஏற்படும் ஆச்சரிய உணர்வை தவிர்க்க முடியவில்லை. மேலும் அருகில் இருந்து பார்த்தாலும் அந்த தந்திரங்களின் இரகசியத்தை கவனிக்க முடியாதபடி அவர் செய்தார்.

இதுவரை பார்த்த மாயாஜால காட்சிகள் எல்லாம் தொலைக்காட்சி நிகழ்ச்சிகளிலோ அல்லது மேடை மீது நடப்பதை தூரத்தில் கீழே உட்கார்ந்து பார்த்ததோதான். அவர் பக்கத்தில் அமர்ந்து கண்ணுக்கு அருகில் 2 அடி தூரத்தில் நடந்த அந்த மாயாஜாலங்களை பார்த்தது ஒரு சிலிர்ப்பான மறக்கமுடியாத அனுபவம்தான். இன்னொரு கூடுதல் சந்தோஷம் அவர் எங்கள் இருவருக்காக மட்டும் பிரத்யேகமாக அவற்றை செய்தது காண்பித்ததுதான்.

Saturday, February 10, 2018

சிரிக்கலாம் வாங்க - 1

திருமண வாழ்க்கையில் கணவன் மனைவிக்கிடையே எத்தனை சண்டை சச்சரவுகள், வாக்குவாதங்கள், மனக்குமுரல்கள் வந்தாலும் மற்றவர்கள் முன்பு  ஒருவரை ஒருவர் விட்டுக் கொடுப்பதில்லை. ஆனால், பலசமயம் அவர்களின் பேச்சும், எண்ணங்களும், செய்கைகளும் அவர்களையே மனம் விட்டு சிரிக்கவைக்கவும் செய்துவிடும். அப்படிப்பட்ட சில நகைச்சுவை உங்களுக்காக. 

இவை எல்லாம் எனக்கு வாட்ஸப்பில் வந்தவை. உங்களில் சிலர் இவற்றை முன்பே பார்த்திருக்கலாம். இருந்தாலும் இன்னொரு முறை சிரித்ததால் உடல் நலத்திற்கு நல்லதுதானே. 

தமிழாக்கம்: கோவில் சுவற்றில் எழுதப்பட்ட ஒரு அறிவிப்பு - உங்கள் மனைவியை கூட்டமான இடங்களில் தனியாக விடாதீர்கள். அவள் தொலைந்துபோனால், கடவுள் உங்கள் வேண்டுதலை நிறைவேற்றிவிட்டார் என்று நீங்கள் தவறாக நினைதுக்க் கொள்ளலாம்.

இந்த படத்தை பற்றி சொல்வதற்கு ஒன்றும் இல்லை தானே.

இந்த சிரிப்பை கருத்தாக்கம் செய்தவருக்கு கண்டிப்பாக ஒரு 'ஓ' போடலாம். 

தமிழாக்கம்: ஒரு பெண் சொல்வது எப்போதும் சரி, ஒரு ஆண் சொல்வது எப்போதும் தவறு என்று ஏற்றுக்கொண்டால், பிறகு ஒரு ஆண் ஒரு பெண்ணிடம் அவள் சொல்வது சரி என்று சொன்னால், அந்த ஆண் சொல்வது சரியா? தவறா?
அட! இது குடும்பம் ஒரு கதம்பம் படத்தில் விசு சொல்ற "பைத்தியக்கார ஆஸ்பத்திரியில் ......." வசனம் போலவே இருக்கே. 

தமிழாக்கம்
மனைவி - இன்றைக்கு எனக்கு ஓய்வு வேண்டும். அதனால் சினிமாவிற்கு 3 டிக்கெட் வாங்கியிருக்கிறேன்.
கணவன் - 3 டிக்கெட் என்? (நாம ரெண்டு பேர் தானே போகப்போறோம் என்று நினைத்துக்கொண்டு)
மனைவி - உங்களுக்கும் உங்க அம்மா அப்பாவிற்கும்.

தமிழாக்கம்: கணவனும் மனைவியும் விவாகரத்து பெற நீதிமன்றம் சென்றனர். நீதிபதி, "உங்களுக்கு 3 குழந்தைகள் இருக்கிறார்கள். அவர்களை எப்படி பிரித்துக்கொள்வீர்கள்?" என்று கேட்கிறார். அவர்கள் இருவரும் நீண்ட நேரம் கலந்தாலோசித்த பிறகு மனைவி சொல்கிறாள், "சரி ஐயா, நாங்கள் அடுத்த வருடம் இன்னுமொரு குழந்தையோடு வருகிறோம்" என்று. 9 மாதங்கள் கழித்து அவர்களுக்கு இரட்டை குழந்தைகள் பிறந்தன. விதி யாரை விட்டது?!

Saturday, February 03, 2018

உஷாரய்யா உஷாரு



உங்களுக்கு தெரிஞ்சே உங்களுக்கு தெரியாம உங்ககிட்ட பணம் பறிக்க முடியுமா?

என்னடா ஆச்சு இவனுக்கு? தூக்க கலக்கத்துல எதையோ தட்டி விட்டிருக்கானான்னு நெனைக்காதீங்க. பதிவ முழசா படிச்சா உங்களுக்கு நான் சொல்ல வர விஷயம் புரியும்.


சூப்பர் மார்க்கெட்ல அடிக்கடி பொருட்கள் வாங்கும் பழக்கம் உங்களுக்கு இருக்கா? அப்படின்னா கொஞ்சம் உஷாரா இருங்க. என்னடா குண்ட தூக்கி போடறானேன்னு பயப்படாதீங்க. கொஞ்சம் கவனமா இருந்தீங்கன்னா உங்களுக்கு நஷ்டம் வராம பாத்துக்கலாம்.

super market, shopping, சூப்பர் மார்கெட்
இந்த பொண்ணுங்க மாதிரி பொருளோட வெலய பாத்து வெச்சிக்கோங்க 
சூப்பர் மார்க்கெட்ல எந்த பொருள் எடுத்தாலும் கூடைலியோ தள்ளு-வண்டியிலோ போடறதுக்கு முன்னாடி அதோட விலையை மனசுல குறிச்சி வெச்சிப்பேன். அது என்னோட பழக்கம்.

அதே மாதிரி, பில் போடற கம்ப்யூட்டர் ஸ்க்ரீன் நம்மள பார்த்து இருந்தா, அவங்க ஒவ்வொரு பொருள பில்லுல எத்தும்போதும் அதோட விலைய செக் பண்ணிப்பேன். எதாவது தப்பு இருந்தா, உடனே அவங்கள கேப்பேன். ஸ்கரீன பாக்கமுடியலன்னா பில்ல கைல வாங்கினதும் மொத வேலையா பொருட்களோட விலைய சரி பாப்பேன்.


ஒருவாட்டி ஒரு சூப்பர் மார்க்கெட்ல பொருட்களோடு பழங்களும் வாங்கினேன். பல வகை அப்பிள்கள் அங்க இருந்தது. நான் அதுலேர்ந்து எனக்கு வேண்டிய வகை அப்பிளை எடுத்துகிட்டு மறக்காம அதோட விலையை பார்த்து வெச்சிகிட்டேன்.


கவுன்ட்டர்ல பில்ல போட்டு பணத்த கட்டினேன். பில்ல வாங்கி பார்த்தப்பதான் தெரிஞ்சுது நான் வாங்கின அப்பிளோட விலைய போடாம விலை ஜாஸ்தியான வெளிநாட்டு அப்பிளோட விலைய தட்டி பில் போட்டிருக்காங்கன்னு. உடனே அவங்க கிட்ட சொன்னதும் ஓடிப்போய் நான் வாங்கின அப்பிளோட விலைய சரி பார்த்துட்டு வந்து பில்ல மாத்தி போட்டு மீதி காச குடுத்தாங்க. 

இதுபோல ரெண்டு மூணு வாட்டி வேற வேற பொருள்ல நடந்திருக்கு. கேட்டதுக்கப்பறம்தான் தலைய சொறிஞ்சிகிட்டு பில்ல மாத்துவாங்க. சாரி கூட சொல்லமாட்டாங்க. (ஒருவேள பில் போடற பொண்ணுங்க சுரிதார் போட்டிருந்ததாலோ என்னவோ!)

இன்னொருவாட்டி வேற ஒரு சூப்பர் மார்க்கெட்ல ஷு பாலிஷ் வாங்கினேன். அதோட வெல 65 ரூபா. ஆனா பில்லுல பாத்தா 67-னு இருந்துச்சி. என்னடான்னு கேட்டா பதிலே சொல்லாம 2 ரூபாவ திருப்பி குடுத்தான். உன் கம்ப்யூட்டர்ல பொருளோட விலைய மாத்துப்பான்னு சொல்லிட்டு வந்தேன். மாத்தினானோ இல்லையோ தெரியாது.


வேற ஒரு வாட்டி, சூப்பர் மார்க்கெட் மாதிரி நாமளே உள்ள போய் பொருள எடுக்கற ஒரு மளிகை கடைல வாங்கினப்ப நடந்த சம்பவம் இது. அங்க ஒரு எடத்துல பில்ல போட்டு இன்னொரு இடத்துல காசு கொடுக்கணும். பில்ல வாங்கி செக் பண்ணினப்போ, பாதி பில்லா பாக்கறதுக்குள்ள ரெண்டு மூணு வாங்காத பொருள் பில்லுல இருந்தது. கட மொதலாளிய கூப்டு சொன்னேன். அவர் வந்து கூடைல இருந்த பொருள எல்லாம் எடுத்து ஒவ்வொன்னா பில்லோட செக் பண்ணாரு.

அந்தாளுக்கு அதிர்ச்சி. வாங்காத சில பொருளுக்கு பில் போட்டமாதிரி வாங்கின சில பொருளுங்க பில்லுல இல்ல. அதுவும் வெல அதிகமா இருக்கற துவரம் பருப்பு மாதிரியான பொருளுங்க. அப்ப துவரம் பருப்பு கிலோ 2௦௦ ரூபா கிட்ட இருந்தது. அப்பத்தான் தெரிஞ்சுது பில்லு போட்ட ஆளு வேலைக்கு புதுசுன்னு. பொருளோட கோட (code) தப்பு தப்பா தட்டி பில் போட்டிருக்காரு. நான் செக் பண்ணாம விட்டிருந்தா எனக்கு லாபம். ஏன்னா பில்லுல விடுபட்ட பொருளெல்லாம் வெல ஜாஸ்தி. தப்பா பில்லுல சேத்த பொருளெல்லாம் வெல கம்மி. இருந்தாலும் நமக்கு நீதி, நேர்மை, நியாயம் தானே முக்கியம். என்ன நான் சொல்றது சரிதானே?


அதேபோல இன்னொரு விஷயம். சில பொருட்களுக்கு ஏதாவது இலவச இணைப்பு இருக்கும். வாங்கற பொருளுக்கு அப்படி ஏதாவது இருந்தா அதையும் ஞாபகம் வெச்சுப்பேன். பில் போடும்போதே அவங்களுக்கு நியாபகப்படுத்துவேன். இல்லன்ன பல சமயம் அவங்க சைலெண்டா இலவசத்த குடுக்காம விட்டுடறாங்க.


அது கொழந்தைங்களுக்கான பொருளா இருந்து இலவசத்த மறந்துட்டு வீட்டுக்கு போயிட்டோம்னா செத்தோம். மறுபடியும் கடைக்கு ஓடிவந்து அந்த இலவசத்த கேட்டு வாங்கிட்டு போகணும். அந்த ட்ரிப்ல கொழந்தைங்க கண்டிப்பா நம்மகூட வருவாங்க. நேரம் சரியில்லன்னா அங்க அவங்க வேற எதாவது பொருள பாத்துட்டு அதுவும் வேணும்னு அடம் பிடிச்சி பர்சுல இருக்கற மிச்சம் மீதி காசுக்கும் வேட்டு வெச்சிடுவாங்க. .

என்னடா இப்பிடி அல்பதனமா 2 ரூபா 3 ரூபா விஷயத்த பெருசா சொல்றானேன்னு நெனைக்காதீங்க. ஒத்த ரூபாவா இருந்தாலும் ஒழச்சி சம்பாதிச்ச காசாச்சே. எமாத்தரான்னு தெரிஞ்சப்பரம் விட மனசு வருமா? அந்நியன் படத்துல வருமே - 5 பைசா திருடினா தப்பா? 5 தடவ 5 பைசா திருடினா தப்பா? 5 கோடி பேர்கிட்ட 5 தடவ 5 பைசா திருடினா தப்பா?-னு. அந்த வசனம் உங்களுக்கு ஞாபகம் இருக்கும்னு நெனைக்கிறேன். கேக்கரவங்களுக்குத்தான் அந்த காசு திரும்ப கெடைக்குது. கேக்காதவங்க எத்தன பேரோ?

இதெல்லாம் அவங்க தெரிஞ்சி செய்யறாங்களோ தெரியாம செய்யறாங்களோ, பாதிப்பு என்னவோ நமக்குத்தான். அதனால நாமதான் மக்களே உஷாரா இருக்கணும். உங்களுக்கும் இதுபோல அனுபவம் இருக்கும்னு நெனைக்கிறேன். இருந்தாலும் என்னவோ உங்ககிட்ட சொல்லணும் தோணிச்சு. சொலிட்டேன். பாத்து சூதானமா இருந்துகோங்க.